Insidious: Chapter 3 (2015) ဟာ Insidious Universe ရဲ့ တတိယမြောက်ဇာတ်ကားဖြစ်ပြီး Timeline အရဆိုပထမနှစ်ကားရဲ့ ရှေ့ကဇာတ်လမ်း ဖြစ်ပါတယ်။ James Wan အစား ဇာတ်ညွှန်းရေးဆရာ Leigh Whannell က ပထမဆုံးအကြိမ် ဒါရိုက်တာအဖြစ် ပြောင်းလဲရိုက်ကူးခဲ့တာဖြစ်ပြီး Elise, Specs နဲ့ Tucker တို့ ဘယ်လိုစတင်ဆုံစည်းခဲ့ကြလဲဆိုတာကို အဓိကပုံဖော်ထားပါတယ်။

ဇာတ်လမ်းက Lambert မိသားစု ခြောက်လှန့်မခံရခင် ၃ နှစ်အလိုကို အခြေခံထားပါတယ်။ အထက်တန်းကျောင်းသူလေး Quinn Brenner ဟာ ဆုံးပါးသွားတဲ့ သူမရဲ့မိခင်ကို ဆက်သွယ်ဖို့ကြိုးစားရင်းနဲ့ မတော်တဆ တခြားမကောင်းဆိုးဝါးဝိညာဉ်တစ်ခုကို ခေါ်ယူမိသလို ဖြစ်သွားပါတယ်။

အဲဒီနောက် သူမဟာ ကားတိုက်မှုဖြစ်ပြီး ခြေထောက်နှစ်ဖက်လုံး ကျိုးသွားတဲ့အတွက် အိမ်ထဲမှာပဲ ငြိမ်ငြိမ်လေးနေရင်း အောက်ဆီဂျင်နှာခေါင်းစည်းတပ်ထားတဲ့ The Man Who Can't Breathe ဆိုတဲ့ ကြောက်မက်ဖွယ်ဝိညာဉ်ဆိုးရဲ့ အန္တရာယ်ပြုခြင်းကို ခံရပါတော့တယ်။ သမီးဖြစ်သူကို ကယ်တင်ဖို့အတွက် ဖခင်ဖြစ်သူဟာ နာမည်ကြီး ၀ိညာဉ်အကြားအမြင်ဆရာမကြီး Elise Rainier ကို အကူအညီတောင်းခံရာကနေ Elise တစ်ယောက် The Further (ဝိညာဉ်လောက) ထဲကို ပြန်လည်ဝင်ရောက်ပြီး ကယ်တင်ဖို့ ကြိုးစားရပါတော့တယ်။

ဒီကားဟာ သာမန်သရဲခြောက်တာထက် "ချစ်ရသူကို ဆုံးရှုံးရခြင်း" ဆိုတဲ့ ဝမ်းနည်းကြေကွဲမှုကို အဓိက အသားပေးရိုက်ကူးထားပါတယ်။ Quinn က သူ့အမေကိုလွမ်းတာ၊ Elise က သူ့ခင်ပွန်းကိုလွမ်းတာတွေကို ကောင်းကောင်းချိတ်ဆက်ပြသသွားပါတယ်။

Quinn ကို ခြေထောက်နှစ်ဖက်လုံး ကျိုးနေတဲ့ ပုံစံမျိုးနဲ့ ပြေးလို့မရတဲ့ အခြေအနေမှာ သရဲခြောက်ခံရအောင် ဖန်တီးထားတာက တကယ့်ကို စိတ်ကျဉ်းကျပ်စရာကောင်းပြီး ကြောက်ရွံ့မှုကို ပိုတိုးစေပါတယ်။

Insidious: Chapter 3 ဟာ ပထမကားရဲ့ အဆင့်အတန်းကို မမီပေမယ့် ဒုတိယကားထက်စာရင်တော့ ဇာတ်ကြောင်းပြန်တာ ရှင်းလင်းပြီး ပိုမိုကြည့်ကောင်းပါတယ်။ သရဲကားကြိုက်သူတွေအတွက်တော့ ကြည့်ရတာ ထိုက်တန်တဲ့ ဇာတ်ကားတစ်ခုဖြစ်ပြီး Insidious Universe ရဲ့ နောက်ခံသမိုင်းကို သိချင်ရင်တော့ မဖြစ်မနေ ကြည့်သင့်ပါတယ်။

AP